नेपाली कांग्रेसका केन्द्रीय सदस्य एवं सांसद शङ्कर भण्डारीले कांग्रेस विगतमा पनि प्रतिपक्षमा रहेको भन्दै पार्टी प्रतिपक्षमा रहे पनि विचलित नहुन कार्यकर्ता र मतदातालाई आग्रह गर्नुभएको छ । शुक्लागण्डकी नगरपालिकाको विभिन्न स्थानमा आज आयोजित कार्यक्रममा उहाँले कांग्रेस प्रतिपक्षमा हुँदै गर्दा पनि काम गरेर देखाउने क्षमता आफूमा रहेको बताउनुभयो । उहाँले सुकुम्वासी समस्या समाधान आफ्नो पहिलो प्राथमिकता भएको र यो समस्या समाधानका लागि आफूले निर्वाचित भए लगत्तै सम्बन्धित निकाय झकझकाउने काम गरेको छु भन्नुभयो ।
विगतमा क्षेत्र नं.२ बाट निर्वाचित जनप्रतिनिधिले अव्यवस्थित र सुकुम्सवासी समस्या समाधान गर्नतर्फ खासै ध्यान नदिएको उहाँको आरोप थियो । “पाँच वर्षभित्र यस क्षेत्रको अव्यवस्थित र सुकुम्वासी समस्या समाधान गरेरै छाड्नेछु”, उहाँले भन्नभुयो । कार्यक्रममा क्षेत्रीय सभापति चुडामणि खनाल, शुक्लागण्डकी नगरपालिकाका प्रमुख कृष्णराज पण्डित, क्षेत्रीय सचिव सन्तोष घिमिरे, महिला सङ्घका उपसभापति चन्द्रकला भट्टराई र वडा सभापति ईश्वर शर्मा लगायतले पार्टी प्रतिपक्षमा रहेर पनि जनताको काम गर्नुपर्नेमा जोड दिनुभएको छ ।